Flugnám

• Hvernig byrja ég í flugnámi?

Þeir sem hafa áhuga á flugnámi geta bókað sig í kynningarflug. Þar er námið kynnt ýtarlega og viðkomandi fer í flugferð til þess að kynnast fluginu áður en námssamningur er gerður.

Einkaflugmannsskírteini PPL-A

Flugskóli Akureyrar veitir kennslu:  grunnnám (basic) / einkaflugmaður PPL-A. Námið er tvíþætt, annars vegar verklegir flugtímar og hins vegar bóklegt námskeið. Einkaflugmannsréttindi veita flugmanni rétt til að fljúga og ferðast hvert sem er um landið og jafnvel erlendis með farþega, en án greiðslu. Þar að auki eru PPL-A réttindin nauðsynleg sem fyrsta skref fyrir þá sem hyggja á nám til atvinnuflugmanns. En atvinnuflugnemar verða að hafa lokið PPL-A prófi áður en hefðbundið bóklegt atvinnuflugnámið CPL hefst. Hversu langan tíma flugnámið tekur veltur mikið á viðkomandi einstaklingi, en þó eru vissar kvaðir um það samkvæmt reglugerðum. Algengt er að flugnemar ljúki námi á 1 - 1 ½ ári. 

Verklegur hluti

Lágmarks tímafjöldi fyrir einkaflugmannspróf er 45 tímar, þar af eru lágmark 25 tímar með kennara og lágmark 10 einflugstímar. Nemandi þarf að vera orðinn 16 ára til að kennari megi senda hann í einflug (solo) og 17 ára til að mega þreyta einkaflugmannspróf. Nánar.

Bóklegur hluti

Samanstendur af níu fögum, Flugreglur, Siglingafræði, Verklag í flugi, Heilbrigðisfræði, Afkasta og áætlanagerð, Vélfræði, Veðurfræði, Flugeðlisfræði og Fjarskipti. Eitt námskeið er haldið árlega, það stendur frá september til desember og/eða janúar til mars, 10-12 vikur og lýkur með prófum hjá flugmálastjórn.  Kennsluefnið eru á ensku, Pooley's PPL-A, en fyrirlestrar, glósur, verkefni og próf eru á íslensku. Kennt er að meðaltali þrisvar sinnum í viku, mánud-fimmtud.. kvöldnámskeið frá 19:00 til 22:00. Nánar.  

Heilbrigðiskröfur

Flugmenn verða að standast ákveðnar heilbrigðiskröfur. Um tvenns konar heilbrigðisvottorð er að ræða, 1. flokks sem er skilyrði fyrir atvinnuflugmenn og 2. flokks sem dugar einkaflugmönnum. Við mælum með að nemar fari í læknisskoðun áður en nám hefst. Til að fá nánari uppl. og panta tíma í læknisskoðun skal hafa samband við læknaritara fluglæknis í síma 463-0197. Sjá hér.